Vivoactive 5-ը չափսերով (42.2 x 42.2 x 11.1 մմ) ավելի փոքր է Venu 3-ից (45.4 x 45.4 x 12.2 մմ): Vivoactive 5-ը նաև քաշով մի փոքր ավելի թեթև է: Նշեմ, որ Venu 3-ն ունի ավելի մեծ էկրան (1.4 դյույմ ընդդեմ 1.2 դյույմի) և պիկսելների ավելի մեծ թողունակություն (454x454 ընդդեմ 390x390-ի): Venu 3-ի շրջանակը չժանգոտվող պողպատից է, իսկ Vivoactive 5-ինը՝ ալյումինից:

Garmin ժամացույցները շուկայում առկա մնացած սմարթ ժամացույցներից զգալի տարբերվում են մարտկոցի լիցքաթափման տևողությամբ: Vivoactive 5 սմարթ ժամացույցի մարտկոցը լիցքաթափվում է 11 օրում (խնայող ռեժիմում՝ 21 օրում), իսկ Venu 3-ինը՝ 14 օրում (խնայող ռեժիմում՝ 26 օրում): Սրանք բավականին մեծ թվեր են նման կարգի սմարթ ժամացույցներիի համար: Համեմատության համար նշեմ, որ Apple-ի սմարթ ժամացույցների մարկտոցը լիցքաթափվում է 36 ժամում:

Venu 3 սմարթ ժամացույցի ներքին հիշողությունը 8 ԳԲ է, իսկ  Vivoactive 5-ինը՝ 4 ԳԲ: Ժամացույցները թույլ են տալիս ներբեռնել երաժշտություն անմիջապես սարքի հիշողության մեջ և լսել առանց սմարթֆոնի առկայության:

Venu 3 ժամացույցներն ունեն ներկառուցված բարձրախոս և միկրոֆոն, ինչը թույլ է տալիս ժամացույցով պատասխանել զանգերին կամ օգտվել սմարթֆոնի ձայնային օգնականից: Բարձրախոսով հնարավոր է նաև լսել երաժշտություն: Vivoactive 5-ի դեպքում երաժշտություն հնարավոր է լսել Bluetooth ականջակալները ժամացույցին միացնելով: Venu 3-ի բարձրախոսով հնարավոր է նաև ստանալ ձայնային հուշումներ վազելու և քայլելու ընթացքում: 

Vivoactive 5 և Venu 3 ժամացույցներով կարող եք տեսնել բջջային սարքի ծանուցումները, ինչպես նաև ղեկավարել սմարթֆոնում նվագարկվող երաժշտությունը: Նշեմ, որ ժամացույցները ցուցադրում են ծանուցումներում առկա ֆոտո պատկերները: Ժամացույցները նաև առաջարկում են «Առավոտյան տեղեկատվություն» գործառույթ, որտեղ ցուցադրվում են օրացույցում առկա իրադարձություննեը, եղանակը, քունը և առողջությանը վերաբերող որոշ տվյալներ:

Vivoactive 5 և Venu 3 ժամացույցների «Քնի մարզիչ» գործառույթի շնորհիվ կստանաք քնի գնահատական և տեղեկություն այն մասին, թե որքան քուն է Ձեզ անհրաժեշտ ու ինչպես կարող եք այն բարելավել։  Նույնիսկ կարող եք հետևել քնի տարբեր փուլերին, այդ թվում ցերեկային քնին, և տեսնել մի շարք կարևոր ու հիմնական ցուցանիշներ, ինչպիսին է HRV կարգավիճակը՝ Ձեր առողջության մասին ավելի լավ պատկերացում կազմելու համար։ Նշեմ, որ Apple Watch-ում առկա քնին հետևելու գործառույթն ավելի սահմանափակ է վերոնշյալ ժամացույցների հետ համեմատած: 

Նոր ժամացույցներում ներդրված է նաև ցերեկային քնի հայտնաբերման և մոնիթորինգի գործառույթ, ինչը նոր հնարավորություն է Garmin ժամացույնցներում և բավականին օգտակար է առօրյայում: Այս գործառույթը թույլ է տալիս ավտոմատ հայտնաբերել ցերեկային քունը, գրանցել վերջինիս ազդեցությունը օրգանիզմի վրա:

Venu 3 ժամացույցների JET LAG խորհրդատուի միջոցով կարող եք ճանապարհորդելու ընթացքում հետևել Ձեր քնին՝ օգտվելով անհատականացված խորհուրդներից, ինչը կօգնի նվազագույնի հասցնել ժամային գոտու փոփոխության հետևանքները։ Vivoactive 5 ժամացույցներում այս խորհրդատուն չկա:

Vivoactive 5 և Venu 3 ժամացույցների օգնությամբ կարող եք հետևել Ձեր մարմնի էներգիայի սպառմանը ամբողջ օրվա ընթացքում, և կարող եք գտնել ակտիվության ու հանգստի լավագույն ժամանակահատվածը: Այդ թվում, կարող եք մանրամասն պատկերացում կազմել այն մասին, թե ինչպես են քունը, ցերեկային քունը, ամենօրյա գործունեությունը և բարձր սթրեսը հատկապես ազդում Ձեր էներգիայի վրա:

Vivoactive 5 և Venu 3 ժամացույցների օգնությամբ կարող եք հետևել Ձեր յուրաքանչյուր շարժին և ակտիվությանը ավելի քան 30 սպորտային ծրագրերով՝ ներառյալ քայլը, վազքը, հեծանվազքը, լողը՝ լողավազանում, մարզանքներ հաշմանդամություն ունեցող մարդկանց համար և այլն։ Venu 3 ժամացույցի տարբերությունը Vivoactive 5-ից այստեղ այն է, որ մարզումների ժամանակ էկրանի վրա ցուցադրվում են սպորտային անիմացիաներ:

Vivoactive 5 և Venu 3 ժամացույցների օգնությամբ կարող եք ավելի լավ հասկանալ, թե ինչպես է յուրաքանչյուր մարզում ազդում Ձեր մարմնի վրա և ինչքան ժամանակ է անհրաժեշտ վերականգնման համար, որպեսզի կարողանաք կատարել ցանկացած ֆիթնես մարտահրավեր։

Vivoactive 5 և Venu 3 ժամացույցների օգնությամբ կարող եք իմանալ Ձեր մարզավիճակի տարիքը՝ իսկական տարիքի հետ համեմատ։

Vivoactive 5 և Venu 3 ժամացույցներով կանայք կարող են հետևել իրենց մինստրուալ ցիկլին կամ հղիությանը: Հնարավորություն կա ախտանիշները նշելով ստանալ վարժությունների և սննդակարգի մի շարք խորհուրդներ՝ ուղղված վիճակի կարգավորմանը։

Երկու ժամացույցներն էլ չափում են սրտի աշխատանքը, սակայն Venu 3 ժամացույցն ունի ավելի կատարելագործված և ավելի ճշգրիտ Garmin Elevate 5 սենսորներ: Vivoactive 5-ում օգտագործում են Elevate 4 սենսորները: Եթե սրտի աշխատանքի ցուցանիշը Ձեր համար այդքան էլ կարևոր չի, ապա այստեղ զգալի տարբերություն պետք է որ չզգաք: Նշեմ, որ ի տարբերություն Apple-ի ժամացույցներից, Garmin-ը տալիս է վայրկյանական ճշգրիտ թարմացումներ սրտի աշխատանքի համար:

Vivoactive 5 և Venu 3 ժամացույցների օգնությամբ կարող եք հետևել արյան մեջ թթածնի հագեցվածությանը՝ քնած կամ արթուն ժամանակ։

Vivoactive 5 և Venu 3 ժամացույցներն ավտոմատ զգում են, երբ Դուք վտանգի մեջ եք, և ավտոմատ կերպով Ձեր գտնվելու վայրի տվյալները ուղարկում են Ձեր վստահված կոնտակներին:

Venu 3 ժամացույցներում առկա է բարձրաչափ (ալիտմետր), որն օրինակ չափում է, թե քանի աստիճան եք բարձրանում օրվա ընթացքում: Vivoactive 5-ում այս սենսորը չկա: Vivoactive 5-ում չկա նաև գիրոսկոպ, ինչն առկա է Venu 3-ում:

Հայաստանում Garmin-ի պաշտոնական խանութում Vivoactive 5-ը վաճառվում է 139000 դրամով, իսկ Venu 3-ը՝ 235000 դրամով: Նշեմ, որ Հայաստանի պաշտոնական խանութի գները գրեթե չեն տարբերվում այս ժամացույցների եվրոպական գներից: