Redmi ընկերությունը ցուցադրեց Redmi Watch սմարթ ժամացույցների թարմացված մոդելը, որը կոչվում է Redmi Watch 2: Այս սարքում ավելացել է արյան մեջ թթվածնի հագեցվածությունը չափելու SpO2 սենսոր: Նախորդ մոդելի հետ փոխվել է նաև էկրանը (1.4 դյույմ IPS-ից դարձել է 1.6 դյույմ AMOLED): 

Ժամացույցները կարողանում են  հետևել 117 տեսակի ֆիզիկական վարժությունների ակտիվությանը: Ժամացույցներում ներդրված է GPS մոդուլ: 

Նշվում է նաև NFC մոդուլի առկայության մասին, սակայն պարզ չէ, թե գլոբալ տարբերակում դրանով վճարում կլինի անել, թե չէ: 

Բնականաբար ժամացույցներում առկա են նաև 24 ժամ ռեժիմով սրտի աշխատանքին և մարդու քնին հետևելու գործառույթներ:

Redmi Watch 2 սմարթ ժամացույցների մարտկոցը մեկ ամբողջական լիցքավորելուց հետո աշխատում է 12 օր: Ժամացույցը պաշտպանված է ջրից (5 АТМ, 50m): Ժամացույցի քաշը 31 գրամ է: Redmi Watch 2 ժամացույցներն արժեն մոտ 60 դոլար:

Instagram-ի սթորիներում ավելացել է ակտիվ հղում տեղադրելու հնարավորություն, որից կարող են օգտվել բոլոր օգտատերերը: Հիշեցնեմ, որ նախկինում այս հնարավորությունից կարող էին օգտվել միայն վերիֆիկացված պրոֆիլները և շատ հետևորդներ ունեցողները: Հղում ավելացնելու համար պետք է սթորիի վրա տեղադրել Link ստիկերը:

Instagram-ի կայքում այսուհետ հնարավոր է նաև անմիջապես համակարգիչներից տեղադրել լուսանկարներ և վիդեոներ: 

Instagram-ում հայտնվել է նաև համատեղ գրառումներ կատարելու հնարավորություն: Այսինքն կարող եք հրավիրել ընկերներից մեկին դառնալ գրառման համահեղինակ և այդ գրառումը կհայտնվի երկուսիդ էջերում ու հետևորդների մոտ: Գրառման վրա կցուցադրվեն երկու օգտատերերի անունները:

Redmi Note 11 սմարթֆոնն աշխատում է Mediatek Dimensity 810 պրոցեսորով: Սմարթֆոնն ունի 6,6 դյույմանոց IPS էկրան (FHD+, 50/60/90 Հց): Օպերատիվ հիշողությունը 4/6/8 ԳԲ, ներքին հիշողությունը՝ 128/256 ԳԲ: 

Սմարթֆոնի մարտկոցը 5000 մԱժ է, որը լիցքավորվում է 33 Վտ հզորությամբ: Սմարթֆոնի տեսախցիկը բաղկացած է 2 մոդուլներից՝ 50 Մպ (հիմնական) և 8 Մպ (լայնանկյուն): Սմարթֆոնի առջևի տեսախցիկը 16Մպ է: 

Սմարթֆոնի մատնահետքի սկաները տեղադրված է կողքի անջատման/միացման կոճակի մեջ: Սմարթֆոնը չունի MicroSD քարտ տեղադրելու հնարավորություն: Սմարթֆոնն ունի ականջակալներ միացնելու համար 3.5 մմ բնիկ, ստերեո դինամիկները և ինֆրակարմիր սենսոր: 

Սմարթֆոնն ունի USB Type-C, Wi-Fi 6, Bluetooth 5.0, GPS, LTE, 5G, NFC մոդուլներ: Սմարթֆոնը ջրից և փոշուց պաշտպանված է IP53 ստանդարտով: Սմարթֆոնի բազային մոդելի գինը $187 է:

Redmi Note 11 Pro սմարթֆոնն աշխատում է Mediatek Dimensity 920 պրոցեսորով: Սմարթֆոնն ունի 6,67 դյույմանոց AMOLED էկրան (FHD+, 120 Հց, HDR10+, Gorilla Glass 5): Օպերատիվ հիշողությունը 6/8 ԳԲ, ներքին հիշողությունը՝ 128/256 ԳԲ: 

Սմարթֆոնի մարտկոցը 5160 մԱժ է, որը լիցքավորվում է 67 Վտ հզորությամբ: Սմարթֆոնի տեսախցիկը բաղկացած է 3 մոդուլներից՝ 108 Մպ Samsung HM2 (հիմնական), 8 Մպ (լայնանկյուն) և 2Մպ (խորության մոդուլ): Սմարթֆոնի առջևի տեսախցիկը 16Մպ է: 

Սմարթֆոնի մատնահետքի սկաները տեղադրված է կողքի անջատման/միացման կոճակի մեջ: Սմարթֆոնը ունի MicroSD քարտ տեղադրելու հնարավորություն: Սմարթֆոնն ունիականջակալներ միացնելու համար 3.5 մմ բնիկ, JBL ստերեո դինամիկները և ինֆրակարմիր սենսոր: 

Սմարթֆոնն ունի USB Type-C, Wi-Fi 6, Bluetooth 5.2, GPS, LTE, 5G, NFC մոդուլներ: Սմարթֆոնը ջրից և փոշուց պաշտպանված է IP53 ստանդարտով: Սմարթֆոնի բազային մոդելի գինը $250 է:

Redmi Note 11 Pro+ սմարթֆոնը Pro տարբերակից տարբերվում է միայն մարտկոցով և լիցքավորման հզորությամբ: Pro+ մոդուլում տեղադրված է 4500 մԱժ մարտկոց, սակայն այն լիցքավորվում է 120 Վտ հզորությամբ: Լիցքավորման համապատասխան ադապտերը տուփի մեջ է: 

0-ից 100% սմարթֆոնը լիցքավորվում է 15 րոպեում: Սմարթֆոնը հովացվում է հեղուկային տեխնոլոգիայով:  Սմարթֆոնի բազային մոդելի գինը $300 է:

Տելեգրամը պաշտոնապես թողարկել է իր գովազդային պլատֆորմը: Գովազդներն այսուհետ ցուցադրվելու են 1000-ից ավել հետևորդ ունեցող ալիքներում: Նշվում է, որ ցուցադրվող գովազդները միայն տեսքստային են և ունեն առավելագույնը 160 սիմվոլ: Գովազդները չեն պարունակում արտաքին հղումներ: Գովազդները համապատասխանելու են ալիքների բովանդակությանը և օգտատիրոջ նախասիրությունների մասին տվյալներ չեն հավաքելու: Սա նշանակում է, որ նույն գովազդը երևալու է բոլոր օգտատերերին:

Գովազդատուները հնարավորություն ունեն ընտրել այն ալիքները, որտեղ ցուցադրվելու են գովազդները: Հնարավոր է նաև ֆիլտրել ալիքները ըստ լեզուների և բովանդակության: Գովազդատուները կարող են նաև ընտրել ալիքներ, որտեղ չեն ցանկանում երևա գովազդը:

Առայժմ այս պլատֆորմը գտնվում է վերջնական փորձարկման փուլում և գովազդի ամբողջ հասույթը գնալու է Տելեգրամին: Հետագայում ալիքների ադմինները նույնպես կարող են իրենց ալիքներում ցուցադրվող գովազդներից գումար վաստակել:

Tesla ընկերության կապիտալիզացիան պատմության մեջ առաջին անգամ անցավ 1 տրիլիոն դոլարի շեմը: Նախկինում այդ շեմը հաջողվել էր հաղթահարել 6 ընկերությունների, որոնցից միայն PetroChina-ն է, որ տեղեկատվական տեխնոլոգիայի ոլորտից չի: 

Նշված շեմը հաղթահարել են նաև Apple, Microsoft, Amazon, Facebook և Google (Alphabet) ընկերությունները: Հիշեցնեմ, որ Apple և Microsoft ընկերությունների կապիտալիզացիան հաղթահարել է նաև 2 տրիլիոն դոլարի շեմը:

Տվյալ պահին Tesla-ի մեկ ակցիայի գինը 1024 դոլար է: Գների աճի վրա հավանաբար ազդել է այն փաստը, որ ավտովարձույթով զբազվող Hertz ընկերությունը հայտնել է 100 հազար Tesla էլեկտրական մեքենա գնելու մասին: Tesla Model 3-ը սեպտեմբերին Եվրոպայում ամենաշատ վաճառված ավտոմեքենան է: Իլոն Մասկի կարողությունը նույնպես շատացել է և նա տվյալ պահին համարվում է աշխարհի ամենահարուստ մարդը:

Rockstar ընկերությունը ցուցադրեց GTA Trilogy խաղի թրեյլերը, որը ներառում է GTA նախորդ խաղերի թարմացված տարբերակները: Թրեյլերում կարող ենք տեսնել, թե ինչ գրաֆիկական փոփոխություններ են կատարվել: Խաղերը հասանելի կլինեն մոտ երկու շաբաթից:

Ամիսներ առաջ Windows 11-ի ներկայացման ժամանակ Microsoft ընկերությունը հայտնեց, որ այն ներառելու է Android համակարգի խաղերն ու հավելվածները բացելու հնարավորություն և դրանք աշխատելու են ինչպես Windows-ի առանձին սովորական հավելվածներ: Հոկտեմբերի 5-ին թողարկված Windows 11-ի ստաբիլ տարբերակում այս գործառույթը բացակայում է և Microsoft-ը պլանավորում է այն ավելացնել 2022 թվականին: 

Windows 11-ի Insider Preview վերջին տարբերակում ավելացել է այս գործառույթը փորձարկելու հնարավորություն: Սակայն այն հասանելի է միայն այն դեպքում, եթե համակարգիչը բավարարում է համապատասխան պայմաններին, համակարգի ռեգիոնը պետք է դրված լինի ԱՄՆ և Ամազոնի պրոֆիլը պետք է լինի ԱՄՆ-ի պրոֆիլ: Հիշեցնեմ, որ Windows 11-ում Անդրոիդ հավելվածները հասանելի են լինելու Amazon Market-ի միջոցով: Այսինքն Windows 11-ում տեղադրվում է Անդրոիդ համակարգ և այն ունենալու է Amazon Market, որտեղից հնարավոր կլինի ներբեռնել հավելվածներ:

Այս սահմանափակումները բնականաբար շրջանցելու ձևեր կան: Եկեք տեսնենք, թե ինչպես Windows 11-ի ստաբիլ և փորձնական տարբերակներում տեղադրել Android-ի ենթահամակարգը և այնտեղ տեղադրել ինտերնետից ներբեռնված ցանկացած apk ֆայլ:

Նախևառաջ պետք է Windows 11-ում միացնել Virtual Machine Platform և Windows HyperVisor Platform կոմպոնենտները: Դրա համար պետք է որոնման դաշտում գրել Turn Windows features on or off և բացված էկրանում ընտրել համապատասխան կոմպոնենտները:

Հաջորդ քայլում պետք է ներբեռնել և տեղադրել Android-ի ենթահամակարգը: Այն հասանելի է Windows Store-ում, սակայն միայն բետա տարբերակներում, հատուկ համակարգիչների վրա և ԱՄՆ տարածաշրջանի համար:

Այստեղ մեզ օգնության է գալիս store.rg-adguard.net կայքը, որը թույլ է տալիս հասցեի միջոցով ներբեռնել Windows Store-ի հավելվածները: Այսպիսով բացեք այս կայքը, հասցեի դաշտում գրեք՝

https://www.microsoft.com/en-us/p/windows-subsystem-for-android/9p3395vx91nr

Այնուհետև ընտրեք Slow տարբերակը և սեղմեք որոնման կոճակը: 

Բերված արդյունքների մեջից ընտրեք ամենամեծ ծավալով (1ԳԲ-ից ավել) msixbundle ֆայլը (հիմնականում ամենաներքևի ֆայլն է):

Ներբեռնելուց հետո Start Menu-ում որոնեք ևադմինիստրատորի ռեժիմով բացեք Windows Terminal կամ Windows PowerShell կոնսոլը: 

Բացված ծրագրում գրեք՝

Add-AppxPackage -Path <ֆայլի հասցեն>

որտեղ ֆայլի հասցեն պետք է գրեք ներբեռնված msixbundle ֆայլի հասցեն: Կարող եք Windows File Explorer-ում գտնել ներբեռնված ֆայլը և աջ քլիք անելով միանգամից պատճենահանել հասցեն ու կոնսոլում աջ քլիք անելով այն տեղադրել: 

Կոնսոլում Enter սեղմելուց հետո կտեղադրվի Անդրոիդ ենթահամարգը:

Այնուհետև Start Menu-ն բացելով կտեսնեք նոր տեղադրված Windows Subsystem for Android ծրագիրը: Բացեք այն և միացրեք Developer Mode կարգավորումը: 

Եթե IP հասցեն չի հայտնվում, վերևում սեղմեք Files-ի կողքում գտնվող կոճակի վրա, որպեսզի Android-ի ենթահամակարգը միանա: 

Այնուհետև պատճենեք IP հասցեն և Windows Terminal-ում կամ PowerShell-ում գրեք՝ 

adb connect <պատճենված IP հասցեն>

Եթե ամեն ինչ ճիշտ եք արել, ապա այս պահից սկսած կարող եք adb install հրամանով տեղադրել ցանկացած apk ֆայլ: Պետք է ընդամենը ինտերնետից ներբեռնել apk ֆայլեր (օրինակ ApkMirror կայքից կամ այստեղ) և Windows Terminal-ում կամ PowerShell-ում գրել՝

adb install <ներբեռնված apk ֆայլի հասցեն>

Տեղադրված հավելվածները տեղադրվում են Start Menu-ում որպես առանձին հավելվածներ և դրանք հնարավոր է միանգամից բացել: 

TaskBar-ում նույնպես դրանք հայտնվում են որպես առանձին հավելվածներ:

Windows 11-ի բետա և ստաբիլ տարբերակներում բացակայում է մի չափազանց օգտակար գործառույթ, որը հասանելի էր նախորդ Windows-ներում: Եթե օրինակ Windows 10-ում կամ 7-ում տեքստային ֆայլը քաշեք TaskBar-ի վրա տեղադրված Notepad ծրագրի վրա (որը կարող է տվյալ պահին լինել փակված կամ ծալված), ապա ավտոմատ Notepad-ում կցուցադրվի այդ տեքստային ֆայլը: Այս գործառույթն աշխատում է գրեթե բոլոր ֆայլերի ու ծրագրերի համար (օրինակ լուսանկարը բացել Photoshop-ով,ֆայլը ուղարկել Տելեգրամով և այլն): Այս գործառույթն աշխատում է նաև File Explorer-ի համար: Այսինքն կարող եք ֆայլը քաշել TaskBar-ում բացված թղթապանակի նշանի վրա և այն կտեղադրվի այդ թղթապանակում:

Ցավոք Windows 11-ի TaskBar-ը չունի Drag&Drop գործառույթը: Ընդ որում Windows 11-ում նույնիսկ հնարավոր չի ծրագրի նշանը քաշել և տեղադրել TaskBar-ի վրա: Փոխարենը պետք է աջ քլիք անել ծրագրի վրա և սեղմել Pin to TaskBar մենյուն: 

GitHub-ում բաց ծրագրային կոդով տեղադրվել է մի փոքր ծրագիր, որը թույլ է տալիս ֆայլերը մկնիկով քաշել և բացել Taskbar-ի վրա տեղադրված ծրագրերով: Այդ ծրագիրը գրված է c++ լեզվով: Ծրագիրը Windows-ի ռեգիստրում կամ կարգավորումներում ոչինչ չի փոխում: Այն պարզապես առանձին աշխատող պրոցես է, որը հայտնաբերում է TaskBar-ի վրա Drag&Drop գործողությունը և մկնիկի տակ գտնվող ծրագրով բացում է ֆայլը:

Ծրագրից օգտվելու համար պետք է ընդամենը ներբեռնել exe ֆայլը և աշխատացնել:  Նշեմ նաև, որ որոշ անտիվիրուսներ այս ծրագիրը ճանաչում են որպես վտանգավոր ծրագիրը, սակայն ինչպես արդեն նշեցի այն բաց ծրագրային կոդով է և ոչ մի վնասակար կոդ չկա: