Google-ը պաշտոնապես հայտարարեց, որ նորացված Quick Share տեխնոլոգիան կարող է փոխանակել ֆայլեր iPhone, iPad և Mac սարքերի հետ՝ օգտագործելով AirDrop-ին համարժեք ուղիղ peer-to-peer կապ։ Առանց ինտերնետի, առանց սերվերների, և առանց հավելյալ հավելվածների։
Google-ը AirDrop-ի աջակցությունը իրականացրել է ինքնուրույն: Android սարքը «ներկայանում է» որպես Apple սարք, ինչի շնորհիվ iOS-ը ընդունում է կապը որպես սեփական էկոհամակարգի մաս։ Apple-ը այս գործընթացում որևէ մասնակցություն չի ունեցել։
Ֆայլերի փոխանակման համար iPhone-ում AirDrop-ը պետք է դրված լինի «Everyone» ռեժիմում։ Ֆունկցիան առայժմ հասանելի է միայն Pixel 10 սերիայում։ Google-ը պլանավորում է աստիճանաբար բացել աջակցությունը նաև այլ Android-սմարթֆոնների համար։
Քանի որ իրականացումը կատարվել է առանց Apple-ի պաշտոնական համագործակցության, ընկերությունը կարող է ապագա iOS թարմացումներով սահմանափակել կամ ամբողջությամբ արգելել այս մեխանիզմը։
Bloomberg-ը հայտնում է, որ ԱՄՆ կառավարությունը պաշտոնապես թույլատրել է Firebird ստարտափին Հայաստան արտահանել NVIDIA-ի գերհզոր չիպերը։ Սա բեկումնային որոշում է, որը կայացվել է ԱՄՆ կողմից առաջադեմ չիպերի արտահանման սահմանափակումների թուլացման ֆոնին և հնարավորություն է տալիս Հայաստանը դարձնել տարածաշրջանային տեխնոլոգիական խաղացող։
Ըստ պարբերականի՝ 500 միլիոն դոլար սկզբնական ներդրմամբ և 100 ՄՎտ հզորությամբ այս կենտրոնը կգործի Dell-ի սերվերների ու NVIDIA Blackwell նորագույն պրոցեսորների հիման վրա։ Ստեղծվող ենթակառուցվածքի 20 տոկոսը կուղղվի հայաստանյան ընկերությունների կարիքներին, իսկ հիմնական մասը՝ 80 տոկոսը, կտրամադրվի տարածաշրջանում գործող ամերիկյան բիզնեսներին։ Firebird-ի համահիմնադիր Ռազմիկ Հովակիմյանի և Moderna-ի համահիմնադիր Նուբար Աֆեյանի աջակցությամբ կյանքի կոչվող այս նախաձեռնության առաջին փուլի մեկնարկը սպասվում է 2026 թվականի երկրորդ եռամսյակում։
NVIDIA-ն հենց երեկ՝ նոյեմբերի 19-ին, հրապարակեց նաև իր եռամսյակային ֆինանսական հաշվետվությունը, որտեղ գրանցեց ռեկորդային $57.0 միլիարդ դոլար հասույթ։
Հասույթն աճել է 22%-ով նախորդ եռամսյակից և 62%-ով՝ նախորդ տարվա նույն ժամանակահատվածի համեմատ։ Ամենակարևորը՝ ընկերության «Տվյալների կենտրոններ» (Data Center) ուղղության եկամուտը հասել է $51.2 միլիարդի։
Սա պարզապես հերթական թարմացումը չէ, այլ արհեստական բանականության հետ մեր շփման ձևի արմատական փոփոխություն: Gemini 3 Pro-ն Google-ի երբևէ ստեղծած ամենաուժեղ մոդելն է: Այն հասկանում է բարդ համատեքստը, գրում է ավելի լավ կոդ և կատարում է վերլուծություններ վայրկյանների ընթացքում:
Ի՞նչն է դարձնում Gemini 3-ը յուրահատուկ.
🧠 Նոր մոդելը կառուցված է Google-ի նորարարական ենթակառուցվածքների վրա, ինչը թույլ է տալիս Gemini 3-ին լինել ավելի արագ, ճշգրիտ և տրամաբանող: Այն գերազանցում է նախորդ սերունդներին բարդ խնդիրների լուծման և կոդավորման մեջ:
🎨 Generative UI (Գեներատիվ ինտերֆեյս). Սա թերևս ամենահետաքրքիր նորույթն է: Մինչ այժմ մենք սովոր էինք, որ AI-ը պատասխանում է տեքստով կամ կոդով: Generative UI-ի և Flutter-ի համադրման շնորհիվ՝ մոդելը կարող է իրական ժամանակում ստեղծել ինտերակտիվ վիզուալ էլեմենտներ: Օրինակ՝ եթե հարցնեք ապրանքների մասին, այն ոչ թե ցուցակ կգրի, այլ կցուցադրի ինտերակտիվ քարտեր, գրաֆիկներ կամ կոճակներ, որոնց հետ կարող եք հաղորդակցվել հենց չատի պատուհանում: Օրինակ՝ կարող եք Վան Գոգի մասին ինֆորմացիա տեսնել ինտերակտիվ կայքի տեսքով: Կամ, եթե պլանավորում եք ճամփորդություն, ապա Gemini-ն կարող է գեներացնել ինտերակտիվ երթուղի՝ նկարներով և քարտեզներով, որոնք կարող եք սեղմել և խմբագրել:
🤖Gemini Agent (Նոր հնարավորություն). Սա արդեն ավելին է, քան պարզապես չատբոտ: Gemini Agent-ը կարող է կատարել բազմաքայլ գործողություններ (multi-step tasks)՝ ուղիղ միանալով ձեր Google հավելվածներին: Դուք կարող եք պարզապես հանձնարարել կարգավորել ձեր inbox-ը, և այն կառանձնացնի կարևոր նամակները, կդասավորի անելիքները կամ կպատրաստի պատասխանների սևագրեր: Ավելին, այն կարող է իրականացնել կոնկրետ խնդիրներ, օրինակ՝ գտնել և նախապատրաստել մեքենայի ամրագրումը՝ հիմնվելով միայն ձեր էլ. փոստի տվյալների վրա, ընդ որում՝ կրիտիկական գործողություններից (օրինակ՝ վճարումներից) առաջ այն միշտ կսպասի ձեր հաստատմանը:
🛠Google Antigravity-ն նոր միջավայր է (IDE) ծրագրավորողների համար, որը նախատեսված է ագենտների հետ աշխատելու համար։ Այստեղ դուք ոչ թե պարզապես կոդ եք գրում, այլ ղեկավարում եք AI գործակալներին, որոնք կարող են ինքնուրույն ծրագրեր կառուցել, թեստավորել դրանք և ուղղել սխալները՝ աշխատելով ձեզ հետ զուգահեռ: Դուք կարող եք ստեղծել AI օգնականներ, որոնք ունեն իրենց հիշողությունը, գործիքները և նպատակները: Antigravity-ն թույլ է տալիս տեսնել, թե ինչպես է մտածում AI-ը: Դուք կարող եք հետևել ագենտի որոշումների կայացման ընթացքին, գտնել սխալները և միջամտել աշխատանքին ցանկացած պահի: Սա մի միջավայր է, որտեղ մարդը և AI-ը աշխատում են որպես թիմակիցներ՝ կառուցելով տարբեր բարդության ծրագրեր:
🔍Gemini 3 Search AI Mode. Որոնողական համակարգը դառնում է էլ ավելի խելացի: Նոր ռեժիմը թույլ է տալիս ստանալ խորքային վերլուծված պատասխաններ՝ առանց տասնյակ կայքեր այցելելու անհրաժեշտության:
🚀Եվ ամենակարևորը՝ առայժմ անվճար է. Google-ը որոշել է հասանելի դարձնել Gemini 3 Pro-ն բոլորի համար:
NVIDIA-ն դարձավ աշխարհի առաջին ընկերությունը, որի շուկայական կապիտալիզացիան անցավ 5 տրիլիոն դոլարի սահմանը:
Միայն 4 ամիս առաջ ընկերությունը հաղթահարել էր 4 տրիլիոնի շեմը։
Երեկ NVIDIA-ն հայտարարեց, որ ներդնելու է 1 միլիարդ դոլար Nokia-ում, իսկ վերջերս էլ ներդրումային համագործակցության համաձայնագիր է կնքել Intel-ի հետ։
Բացի այդ, ընկերությունը համագործակցելու է ԱՄՆ Էներգետիկայի նախարարության ազգային լաբորատորիաների և առաջատար ամերիկյան ընկերությունների հետ՝
ստեղծելու Ամերիկայի AI ենթակառուցվածքը, որը կխթանի գիտական բացահայտումները, տնտեսական աճը և կդառնա հաջորդ արդյունաբերական հեղափոխության հիմքը։ 🚀
📈 NVIDIA-ի ակցիաները շարունակաբար աճում են արհեստական բանականության «բումի» շնորհիվ, որը դարձել է ընկերության գլխավոր շարժիչ ուժը։
2022-ին Հայաստանում հիմնվել է NVIDIA-ի հետազոտական կենտրոն, իսկ վերջերս հայտարարվեց նաև, որ Հայաստանի Հանրապետության կառավարության, NVIDIA-ի, Firebird-ի և Team Group-ի համագործակցությամբ կառուցվելու է արհեստական բանականության (ԱԲ) լուծումներով աշխատող՝ տարածաշրջանի ամենահզոր սուպերհամակարգչային և տվյալների մշակման կենտրոնը: Firebird ընկերությունը 2026 թվականին նախատեսում է գործարկել NVIDIA Blackwell գրաֆիկական հազարավոր պրոցեսորներով հագեցած տվյալների կենտրոն՝ մինչև ավելի քան 100 մեգավատտ մասշտաբավորման հնարավորությամբ:
Microsoft-ը սկսել է օգտատերերի համար հասանելի դարձնել Windows 11-ի պատմության ամենամեծ թարմացումը, որի արդյունքում օպերացիոն համակարգը բառացիորեն սկսում է «լսել, տեսնել և հասկանալ» օգտատիրոջը՝ առանց ստեղնաշարի ու մկնիկի օգնության։
🗣️Այժմ համակարգիչը կարելի է կառավարել ձայնով՝ պարզապես ասելով «Hey, Copilot»։ Թարմացված արհեստական բանականությունը կարող է ոչ միայն պատասխանել հարցերին, այլև իրական գործողություններ կատարել։
Ահա Copilot-ի հիմնական նորույթները 👇
Copilot Vision
Վերլուծում է էկրանի ողջ բովանդակությունը, գրում է տեքստեր, գտնում տեսանյութեր և արձագանքում ձայնային հրամաններին։
Copilot Actions
Կարող է ամրագրել սեղան ռեստորանում, պատվիրել ուտելիք կամ օգնել առօրյա գործերում։
Gaming Copilot
Ներկառուցված է Xbox հավելվածում և խաղի ընթացքում տալիս է հուշումներ իրական ժամանակում։
Կարճ ասած՝ ձեր համակարգչում արդեն ապրում է ձեր սեփական «Ջարվիս»-ը 💻🤖
Samsung-ը պաշտոնապես ներկայացրել է իր նորույթը՝ Movingstyle TV մոդելը, որը միավորում է մոնիտորի կոմպակտությունը և հեռուստացույցի հարմարավետությունը։
Նոր սարքն ունի 27 դյույմանոց QuadHD էկրան՝ մինչև 120 Հց թարմացման հաճախականությամբ։ Էկրանը ստացել է HDR10+ վկայագիր, ինչը խոստանում է բարձր պայծառություն և իրական գույներ։
Հեռուստացույցը համալրված է Wi-Fi 5, Bluetooth 5.3 կապերով և ունի մեկ HDMI միակցիչ, որը թույլ է տալիս միացնել այն TV box-ի կամ համակարգչի։ Ձայնի որակի համար պատասխանատու են 10 Վտ ընդհանուր հզորությամբ երկու դինամիկներ։
Ամենահետաքրքիր առանձնահատկությունը՝ ներկառուցված մարտկոցն է, որն ապահովում է մինչև 3 ժամ աշխատանք։ Լիցքավորումն իրականացվում է USB-C պորտով, իսկ տեղափոխելիս կարելի է պարզապես բռնել ծալվող հենակից, որն ապահովում է շարժականության և դիզայնի համադրություն։
Նորույթի արժեքը կազմում է մոտ 1,5 միլիոն կորեական վոն կամ մոտավորապես $1050։
Լեհական CD Projekt RED ընկերության կողմից թողարկված Cyberpunk 2077 խաղն արդեն հասանելի է նաև Mac-երի համար: Խաղում առկա է For this Mac կարգավորում, որը ձեր Mac-ի տեխնիկական պարամետրերից կախված ավտոմատ կարգավորում է խաղի պարամետրերը:
Mac-ի համար խաղը հասանելի է Steam, EGS, App Store և GOG հարթակներում: Հիշեցնեմ, որ Windows-ի և խաղային կոսնոլների համար խաղը թողարկվել էր 2020թ.-ին:
Adobe ընկերությունը Անդրոիդի համար թողարկել է Photoshop ծրագրի բետա տարբերակը, որը հարմարեցված է սենսորային էկրանների համար: Հավելվածն արտաքնապես նման է մինչ այժմ առկա Photoshop Express հավելվածին, սակայն ներառում է համակարգչային տարբերակի մի շարք գործիքներ: Հավելվածում ներառված է նաև Firefly նեյրոցանցի Generative Fill գործիքը, որը թույլ է տալիս տեսքստային հրամաններով փոխել լուսանկարում առկա օբյեկտները կամ ավելացնել նոր օբյեկտներ: Հավելվածում առկա է նաև լուսանկարներում օբյեկտների ավտոմատ առանձնացումը: Առայժմ հավելվածը բետա տարբերակում է և բոլոր գործառույթներն անվճար են: Նշեեմ, որ Photoshop-ի iOS տարբերակը թողարկվել էր ամիսներ առաջ:
Արհեստական բանականությունների բազմազանության և զարգացման ֆոնին որոշեցի նեյրոցանցերի միջոցով ստեղծել հայտնի Wordle խաղի հայերեն տարբերակը: Տվյալ խաղի պարագայում հիմնականում օգտագործել է Google Gemini նեյրոցանցը, որը գեներացրել է ավելի քան 1000 տողանի HTML/JavaScript կոդի մոտ 90%-ը: Ինձ մնում էր կոդում ավելացնել 5 տառանի հայերեն բառեր, կատարել որոշ ծրագրային շտկումներ և տեղադրել խաղը համացանցում:
Wordle խաղում պետք է 6 փորձով գուշակեք տվյալ օրվա 5 տառանի բառը, որը նույն է բոլորի օգտատերերի մոտ: Տվյալ օրվա բառում առկա ճիշտ գուշակած տառերը ներկվում են դեղին, իսկ եթե գուշակում եք նաև տառերի տեղերը, ապա՝ կանաչ:
Փորձել եմ մի փոքր կատարելագործել համացանցում առկա ստանդարտ Wordle խաղերը և Wordle.am խաղում ավելացրել հետևյալ հնարավորությունները՝
➤Տեսնել և խաղալ նախորդ օրերի բառերը
➤Ինտերնետ դիտարկչի հիշողության մեջ ավտոմատ պահպանվում և հետագայում բեռնվում է ընտրված օրվա խաղի ընթացքը
ChatGPT-ն վերջերս թողարկեց նկարների գեներացման նոր մոդել, ինչը բերեց սեփական սերվերների խափանմանը: Սկզբնական շրջանում այս մոդելը հասանելի էր նաև անվճար, սակայն մեծ պահանջարկի պատճառով այն այժմ հասանելի է միայն բաժանորդագրվածներին (անվճար ևս հնարավոր է օգտվել GPT-4o մոդելից, սակայն օրական մի քանի հարցում):
Բանն այն է, որ այս նոր մոդելը կարողանում է վերբեռնված լուսանկարից ստանալ Ghibli անիմե ստուդիայի մուլֆիլմի ոճով նկար: Այդ ստուդիային են պատկանում «Ուրվականներից քշվածները», «Հաուլի քայլող ամրոցը» և այլ նմանատիպ հայտնի անիմացիաները, որոնց ռեժիսորը հանրահայտ Հայաո Միյաձակին է:
Արդյունքում համացանցի օգտատերերը զանգվածաբար ստեղծում են այս ստուդիայի անիմեների ոճով նկարներ և տեղադրում համացանցում, ինչն էլ առաջացնում է chatGPT-ի գրաֆիկական սարքերի մեծ ծանրաբեռնվածություն: OpenAI-ը ստիպված գեներացիայի տևողության ժամանակը երկարացրել է, որպեսզի դիմակայի ծանրաբեռնվածությանը:
Հ.Գ.
Պատրաստվեք, մոտ ժամանակներում նմանատիպ ոճով գեներացված բազմաթիվ լուսանկարներ եք տեսնելու համացանցում 🙃 Գեներացված օրինակները կարող եք տեսնել Տելեգրամի ալիքում:
