Մեկնարկել է activecitizen.am հարթակը, որտեղ քաղաքացիները կարող են ներկայացնել իրենց առաջարկները
![](https://1.bp.blogspot.com/-LN7Nn40PC1Q/XywdvjMHYbI/AAAAAAAAlAQ/psfAd8Ql_YAFvTu_-7_np67HPczVcMb4wCLcBGAsYHQ/s200/Generic-calendar-page-icon.png)
![](https://blogger.googleusercontent.com/img/b/R29vZ2xl/AVvXsEiRu7V0zQn1F29ZbJZSdYHmPyIN0Piv2eIN7BizwvXC_VV1WKdTspqNHkMt8m8w5v2LLXIheEuw2OS0aUSneUlFGdhY8dkgTx1nMZFG7VfXTZYhxEi8b-MDamtqW4PqUhGn9f83g8W4qf1h/s640/frame_safari_light.png)
Հարթակի ստեղծումը 2019թ. նախաձեռնել է Երևանի քաղաքապետարանը՝ քաղաքացիների հետ առավել արդյունավետ և սերտ կապն ապահովելու և մասնակցային կառավարում իրականացնելու նպատակով:
Շնորհիվ «Ակտիվ քաղաքացի» հարթակի՝ երևանցիները հնարավորություն ունեն քաղաքապետարանի հետ համատեղ բարելավելու իրենց բնակավայրը՝ ավելի հարմարավետ և գրավիչ դարձնելով մայրաքաղաքի կյանքը:
Միևնույն ժամանակ, Երևանի քաղաքապետարանի համար առաջարկների այս հարթակը քաղաքացիներին հուզող խնդիրները հավաքելու համակարգ է և լուծումների միասնական որոնման միջոց:
Հարթակը միջավայր է, որը, մայրաքաղաքի բարելավմամբ հետաքրքրված մարդկանց հավաքելու է մեկ վայրում՝ ստեղծելով ակտիվ քաղաքացիների համայնք, որին Երևանի իշխանությունը նաև կներկայացնի գաղափարներ՝ դրանք քննարկելու և կատարելագործելու նպատակով: Այս էլեկտրոնային գործիքը ավելի շոշափելի կդարձնի «մասնակցային կառավարում» հասկացությունը:
Կայքում գրանցված քաղաքացիների իսկության, առաջարկների քննարկման և քվեարկության արդյունքների թափանցիկությունն ապահովելու նպատակով ներդրվել են տեղեկատվական տեխնոլոգիաների ոլորտի ամենաարդիական մեթոդները։ Բոլոր առաջարկները և քվեարկության արդյունքներն ամրագրվում են Blockchain տեխնոլոգիայի միջոցով՝ հաստատելով տվյալների հավաստիությունը և բացառելով կեղծիքը:
«Ակտիվ քաղաքացի» ծրագրի, ընթացակարգերի, ժամկետների, հարթակի աշխատանքի և այլ մանրամասների մասին կարելի է տեղեկանալ Հարթակի կանոններ և Հաճախ տրվող հարցեր բաժիններում: